Day # 18

سالفة اليوم:

شعور رائع عندما ننجز

اسابيع من الاستعدادات انتهت على خير والحمدلله

الاحد 22.ابريل
---

النائب د.علي العمير

زارنا في الكلية باستضافه من نادي أوتو البيئي

وتكلم كلام جدا مهم عن أزمة المياه في الكويت

ومشاركة النادي بالمعرض

"عرض نشيدة العفاسي تخيل لو شحيح الماي"

تعلمت في اليوم:

ان في مثل هذه المواقف اكثر مايحتاج المرء طولة البال و الهدووووء التام

----

مواقف مضحكة مبكية مرت علي وعلى عضوات النادي في هذا اليوم

واهم موقف :

انه البوفيه الذي أحضرناه والمفترض ان يفتح الساعه 12 وجدناه مفتوحا والمشاركين قاعدين ياكلون من الساعه 10

علما انه بالدوور الثالث في قاعه الندوة التي لا يعلم المشاركون عنها ..

شلون دروا !! مادري

بس الحمدلله كان انجاز جميل

:)

==

تذكرة النفس:

" إن الله لا يحب الفرحين"

Day # 17

سالفة اليوم:

تذكرون البوك !!

امي راحت نفس المستوصف

وضيعت بطاقة اختي المدينة

طبعا مع العصبية امي دقت علي

وقالت لي انها بالمستوصف والبطاقة ضاعت

فراح يتأخرون على مايلقونها وطلبت مني اقعد عند التلفون جود احد يدق

سبحان الله طرى على بالي ان اللي رد البوك لصاحبته بيرد لنا البطاقة

لحظات ولا تلفون البيت يرن

السلام عليكم هذا بيت فلان

ايه نعم

انا لقيت بطاقتكم المدنية بالمستوصف

ايه ايه يزاج الله خير ماقصرتي كنا ننطر احد يدق

ترى اختج معاي بالمدرسه وانا لما شفت اسمها عرفتها وباجر بعطيها البطاقة بالمدرسة

: )

الحمدلله

Day # 16

سالفة اليوم :

ابوي الله يحفظه كان في المستوصف أمس

يوم يا البيت كانت معاه مفاجأه !!

لقا بوك طايح عند مصافط المستوصف !!

قعدنا كلنا حوله نتناقش شراح نسوي وشلون نتصرف

طلب مني ابوي افتح البوك اعرف اسم صاحبته سكنها تلفونها اي شي يدلنا عليها !!

البوك فيه مبلغ مو شويه .. وصور شخصية .. وبطاقات فيزا وكينيت و خصومات ........ لكن ماكو اي رقم يدلنا عليها

بالبطاقة المدنية مكتوب عنوان

وفي بطاقة ثانية مكتوب عنوان ثاني !!

قلنا بنروح ندور بيتهم بالعنوان الاول على ما أمي ادور رقمهم من البدالة !

واحنا بالدرب ندور العنوان اتصلت امي وبشرتنا انها لقت رقم بيت يدها .. وراح تتصل علينا صاحبة البوك بعد شوي ..

رجعنا واتصلت علينا كلمتها امي

" الو انا صاحبه البوك .. يزاكم الله خير ماقصرتوا .. انا كنت خايفة على صوري اكثر من اي شي الحمدلله انه طاح بيد أمينة"

طمنتها امي وعطتني ياها أكلمها

" اختي الله يعافيج أبي اأسالج يعني بس عشان أتأكد لانها أمانه.. شنو لون البوك ؟ جم فيه ؟؟ شنو الصور اللي فيه ؟؟ "

وجاوبتني عليه بالضبط

الحمدلله اهيا صاحبه البوك .. تواعدنا معاها وسلمناها الامانه والحمدلله الذي بنعمته تتم الصالحات

: )

Day # 15

سالفة اليوم :

اليوم زرت برنامج اعادة هيكلة القطاع الخاص

(هده خله يتحدى)
راحين نشتغل حق بروجكت لمادة من مواد هالكورس
طلعنا من الكلية الساعة 8 الصبح و معانا كاميرة الفيديو
اول ماوصلنا على طول بديت اصور ..
بس شصور !
ماكو موظفين ولا موظفات .. مكاتب فاضية !
سألنا قالولنا الطاقم كله فوق عندهم وداعية للنائب العام د.وليد الوهيب

رحنا فوق لقينا كـــــل الموظفين هناك والدكتور يلقي كلمة وداع ..
صورت كلمته .. وعقب ماخلص صورنا معاه

ماشاءالله استقبلنا بنفس طيبة و ماقصر معانا

مع انه كان مشغول والناس يبون يسلمون عليه

حتى مدير العلاقات العامة ماقصر

أ.طارق الفرحان

ساعدنا نخلص شغلنا ووصاهم علينا
الحمدلله لي هني سهالات

نزلنا تحت نبيهم يعطونا اعلامياتهم واجهتنا نفسية أحد الموظفات ..

وباليالله عطتنا شغلنا

كرتونين كباااار فيهم هدايا وجناط البرنامج واعلاميات

على مايجهزون الاعلامية رحت اقرب سيارتي من البوابة عشان العمال شايلين كراتين ثقيلة

دخلتها مصافط البرنامج الخاصة ,,

توني صفطت ولا يي الحارس ..

على ويه سمات الغضب

قبل لايتكلم قلتله
أخوي ميخالف تسمح لنا بس دقايق ننزل كراتين و نطلع
أيوه أيوه تفضلي ياأختي

يابو الكراتين وماكفى مو راضين يدخلون بالدبه
فراغناهم بما حووا بدون كراتين

شكرناهم وركبنا السيارة ومشينا

تونا بنطلع منهم

ولا ننحكر بين سيارة صافطة وشاحنه في زاوية المبني
وتحتك سيارتي بالسيارة اللي صافطة موقادرة ارجع ولا قادرة اطلع
فجأة الا واحد يصراخ
سيااااااارتي سياااااااارتي
نزلت الجام
الا ذاك المعصب
رجعي ورا طلعي جدام .. وطلعت
صفطي على جنب صفطي على جنب

حسباله بنحاش

جان يقول اشلون الحين
قلتله اعطيك رقم ابوي انا ما اتفاهم معاك !

عاد بهاللحظة كنت افكر بشي واحد

( ابي البنات اللي معاي يصورون فيديو هالموقف كنت ابي اعرضه بالكلاس)
بس البنات مو على قلبي مايبون يصورون !

وقام يدق تلفون
انا قلت هذا بينادي الشرطة الحين !
ولا يكلم اخوه

الو محمد إلحق دعموا سيارتك دعموا سيارتك

اللـــــه !! شدعوه

انا سيارتي تعورت اكثر منه

ولا بعد طلعت مو سيارته سيارة اخوه
ولا يي اخوه يركض من بعيد
من وين اطلعوا هذيل !!

يا اخوه جان يقول شصار يابنيتي
قلتله زحمه والشارع ضيق و غبار
راح يشوف سيارته
رد جان يقول روحي يابنيتي روحي توكلي على الله

أشــوه الحمدلله
توني بحرك جان احك السيارة اللي جدامي
لاحول ولاقوة الا بالله وبعدين معاي !!

بس اشوه ماعورتها .. كله بسيارتي
وطلعنا
عالساعه 10 ونص
وصلنا الكلية كان وقتها الجو يعني لاباس فيه
بظرق ربع ساعة قلب الجو

تذكرت اني ناسية اوراق الهوم وورك في البيت
طلعت برجع البيت

لا اله الا الله

ماشوف شي جدامي
غبـــــــــــار
مشيت 70

وانا بالدرب دقوا علي تكنسلت كل المحاضرات بسبة الجو

وتكنسل الامتحان < اشوه مو دراسه

وانتهى اليوم الدراسي المغبر المتشنج

---

أدري سالفتي اليوم طويلة بالرغم اني ماحب البوست الطويل

---

سيارتي تحتاج سيرفس -

مشهد الغبار المخيف ذكرني بهول يوم القيامة -

----

دعاء الريح :

اللهم أسألك خيرها وخير مافيها وخير ما أرسلت به واعوذ بك من شرها وشر مافيها وشر ما ارسلت به

Day # 14

سالفة اليوم :

امس كنت في زيارة للهيئة العامة للبيئة لاول مرة للعمل على مشروع لمادة

باختصار باختصار شديد ..

توقعت ان ارى :

مكان جمــيل.. رحب.. مرتب .. وجوه مشرقة يستقبلونا بكل اهتمام ومودة.. توقعت موضوعنا سينتهي بسهالة ويسر..

رأيت :
عكس ما توقعت تماما ..
مكان مقتم كئيب ..
موظفين معكرين المزاج .. جمود رهيب في التعامل .. تعامل ســـئ جدا مع الزوار !!
تأخير الطلبات.. على الرغم من طلبنا للبيانات منذ اسبوع .. وبكتاب .. الا اننا وجدناه غير جاهز ولا احد يعلم عنه شيئ ؟؟
كلن يلقي مسؤليتنا على الاخر ..
صعدنا الدور 5 قالو الدور 3 نزلنا الدور 3 قالوا الدور 5 ....

أسألوا فلان .. اذهبوا لفلانة .. عند فلان .. لا أدري .. ربما تحت .. ربما هناك ..

الغريب ان الموظفين لا يعرفون بعضهم البعض ..(اسألها عن فلانه لاتعرفها مع انها بالمكتب المقابل لها !! كلهم نفس الحاله !! )

بعد عناء وجهد وجدنا ضالتنا ناقصة .. غير مكتملة !!

أشياء غريبة لن أنساها ولا يمكنني وصفها !! لكن تغير الانطباع 180 درجة !!

حسافة حسافة .. ارى ديرتي الحبيبة مازال يؤخرها مثل هؤلاء !

* EPA في الدول الأخرى تعد معلما و صرحا ثقافيا علميا هاما يبنى عليه أساسيات مهمة في صنع القرارات للدولة بأسرها.
الكويت تستاهل !

Day # 13

سالفة اليوم:

أمس بالليل لقيت "خنفسانة" بغرفتي مادري من وين يات

لونها مو أسود . غريب رمادي مخوضر

فما اتوقع يات من البر

المهم انه بالليل و مابي اخليها تسرح وتمرح بالبيت ومابي اذبحها بنفس الوقت

حاولت اصيدها وادخلها بعلبه بس مو مخليتني

.. اروح يمين تروح شمال اروح شمال تروح يمين ..

تعالي راح انقذ حياتج

وبعديــن !! .. خلصينا وراي دوام

حطيت العلبة جدامها واهي تمشي جان تدخل العلبه بروحها وسكرت عليها وخليتها على جنب

الصبح

توقعتها تموت داخل العلبه لان الهواء مايكفيها وتختنق بثاني اكسيد الكربون

بس ليقيتها عايشه

.. !

خذيتها وانا راكبة سيارتي .. فتحت لها العلبه برة .. وطلعت بهدوء ..

وركضت نحو المجهول ..

و تركتني وانا اطالعها واقول في قلبي ..

الله يسامحج سببتيلي ليلة مزعجه وكوابيس مطاردة الخنافس!!

===

تذكير :

مأســــــــــــــاة ما رأيته اليوم في " الهيئة العامة للبيئة" سأتحدث عنها في وقت لاحق

===

طلعت نتايج المسابقة

..

والحمدلله مافزت

:)